ಪಶ್ಚಿಮಬಂಗಾಳದ ಕೊಲ್ಕತ್ತಾ ಮುನ್ಸಿಪಲ್ ಕಾರ್ಪೋರೇಷನ್ ಚುನಾವಣೆಯಲ್ಲಿ ತೃಣಮೂಲ ಕಾಂಗ್ರೆಸ್ ಭರ್ಜರಿ ಜಯ ದಾಖಲಿಸಿದೆ. 144 ವಾರ್ಡ್ ಗಳಲ್ಲಿ 134 ವಾರ್ಡ್ ಗಳನ್ನು ತನ್ನದನ್ನಾಗಿಸಿಕೊಂಡಿದೆ.
ಕೆಎಂಸಿ ಚುನಾವಣೆಯಲ್ಲಿ ಬಿಜೆಪಿ, ಕಾಂಗ್ರೆಸ್ ಮತ್ತು ಎಡಪಕ್ಷಗಳನ್ನು ಭಾರೀ ಮುಖಭಂಗ ಅನುಭವಿಸಿವೆ. ಪ್ರತಿಪಕ್ಷವಾಗಿದ್ದ ಬಿಜೆಪಿ ಕೇವಲ ಮೂರು ಸ್ಥಾನಗಳನ್ನು ಗೆದ್ದುಕೊಂಡಿದೆ. ಎಡರಂಗ ಮತ್ತು ಕಾಂಗ್ರೆಸ್ ತಲಾ ಎರಡು ವಾರ್ಡ್ ಗಳಲ್ಲಿ ಗೆಲುವು ಕಂಡಿವೆ.
ಚುನಾವಣೆಯಲ್ಲಿ ಚಲಾವಣೆಗೊಂಡ ಮತಗಳಲ್ಲಿ ಶೇ.71.95ರಷ್ಟು ಮತಗಳು ಟಿಎಂಸಿಗೆ ಬಿದ್ದಿವೆ. ಎಡರಂಗ 11.13ರಷ್ಟು ಮತ ಪಡೆದುಕೊಂಡಿದೆ. ಬಿಜೆಪಿ ಶೇ.8.94ರಷ್ಟು ಮತ ಗಳಿಸಿದ್ದರೆ, ಕಾಂಗ್ರೆಸ್ ಕೇವಲ 4.47ರಷ್ಟು ಮತ ಪಡೆದುಕೊಂಡಿದೆ.
ಟಿಎಂಸಿ 2015ರ ಕೆಎಂಸಿ ಚುನಾವಣೆಗಿಂತ ಈ ಬಾರಿ ಶೇ.22ರಷ್ಟು ಮತಗಳನ್ನು ಹೆಚ್ಚಿಸಿಕೊಂಡಿದೆ ಎಂದು ವರದಿಗಳು ತಿಳಿಸಿವೆ.
ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮತ್ತು ಪಕ್ಷದ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಮಾತನಾಡಿ, ಇದು ಪ್ರಜಾಪ್ರಭುತ್ವ ಮತ್ತು ಜನರ ಗೆಲುವು. ಚುನಾವಣೆ ಹಬ್ಬದಂತೆ ನಡೆದಿದ್ದು ಜನರು ತಮ್ಮ ಹಕ್ಕುಗಳನ್ನು ಶಾಂತಿಯುತವಾಗಿ ಚಲಾಯಿಸಿದರು.
ಕೆಎಂಸಿ ಚುನಾವಣೆಯ ಫಲಿತಾಂಶದ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಜೆಪಿ ವಕ್ತಾರ ಸಾಮಿಕ್ ಭಟ್ಟಾಚಾರ್ಯ ಬೂತ್ ರಿಗ್ಗಿಂಗ್ ಮತ್ತು ಹಿಂಸಾಚಾರ ಟಿಎಂಸಿ ಎಲ್ಲಾ ವಾರ್ಡುಗಳನ್ನು ಗೆಲ್ಲಬೇಕಿತ್ತು ಎಂದು ವ್ಯಂಗ್ಯ ಮಾಡಿದ್ದಾರೆ.
