ನವೆಂಬರ್ 28ರಂದು ಜಿಂಬಾಬ್ವೆಯಿಂದ ಗುಜರಾತ್ ನ ಜಾಮ್ ನಗರಕ್ಕೆ ಬಂದಿಳಿದ 71 ವರ್ಷದ ಎನ್ಆರ್.ಐ ವ್ಯಕ್ತಿಯಲ್ಲಿ ಒಮಿಕ್ರಾನ್ ರೂಪಾಂತರ ಸೋಂಕು ಇರುವುದು ದೃಢಪಟ್ಟಿದೆ. ಇದು ದೇಶದಲ್ಲಿ ಮೂರನೇ ಪ್ರಕರಣವಾಗಿದೆ.
ಜಿಂಬಾಬ್ವೆ ಪ್ರಜೆಯ ಎರಡು ಸೆಟ್ ಮಾದರಿಗಳನ್ನು ಪರೀಕ್ಷೆಗೆ ಕಳಿಸಲಾಗಿದೆ. ಒಂದು ಮಾದರಿಯನ್ನು ಪುಣೆಯ ರಾಷ್ಟ್ರೀಯ ವೈರಾಲಜಿ ಸಂಸ್ಥೆಗೆ ಮತ್ತು ಇನ್ನೊಂದನ್ನು ಗಾಂಧೀನಗರದ ಗುಜರಾತ್ ಬಯೋಟೆಕ್ನಾಲಜಿ ಸಂಶೋಧನಾ ಕೇಂದ್ರಕ್ಕೆ ಕಳಿಸಿದ್ದು ಒಮಿಕ್ರಾನ್ ಇರುವುದು ಪತ್ತೆಯಾಗಿದೆ.
ಜಾಮ್ ನಗರ ವೈದ್ಯಕೀಯ ಕಾಲೇಜಿನ ಡೆಂಟಲ್ ಕಾಲೇಜಿನಲ್ಲಿ ರಿಲಯನ್ಸ್ ಫೌಂಡೇಶನ್ ಸ್ಥಾಪಿಸಿದ ಕೊವಿಡ್ ಆಸ್ಪತ್ರೆಯಲ್ಲಿ ಡಿಸೆಂಬರ್ 1ರಂದು ದಾಖಲಾದ ರೋಗಿಯು ಕೆಮ್ಮು, ಶೀತ ಮತ್ತು ಗಂಟಲು ನೋವಿನಿಂದ ಬಳಲುತ್ತಿದ್ದರು. ಆತನಲ್ಲಿ ಸೌಮ್ಯ ಲಕ್ಷಣಗಳು ಕಂಡುಬಂದಿವೆ ಎಂದು ಜಿಲ್ಲಾಧಿಕಾರಿ ಡಾ.ಸೌರಭ್ ಪಾರ್ಥಿ ಹೇಳಿದ್ದಾರೆ.
ರೋಗಿಯು ಸಿನೋವಾಕ್ ಲಸಿಕೆಯ ಮೊದಲ ಡೋಸ್ ಮಾತ್ರ ಸ್ವೀಕರಿಸಿದ್ದರು. ನಾವು ಮತ್ತೆ ಅವರನ್ನು ಪರೀಕ್ಷಿಸಲು ಕನಿಷ್ಠ ಮೂರು-ನಾಲ್ಕು ದಿನಗಳು ಬೇಕಾಗುತ್ತವೆ. ರೋಗಿಯಲ್ಲಿ ಒಮಿಕ್ರಾನ್ ಲಕ್ಷಣಗಳು ಇರುವ ಹಿನ್ನೆಲೆಯಲ್ಲಿ ಪ್ರತ್ಯೇಕವಾಗಿ ಇಡಲಾಗಿದೆ ಎಂದು ವೈದ್ಯ ಡಾ.ಚಟರ್ಜಿ ಹೇಳಿದ್ದಾರೆ.
