ಕೊರೊನ ಸೋಂಕಿನಿಂದಾಗಿ ಮುಂಬೈನ ಬ್ರೀಚ್ ಕೆನಡಿ ಆಸ್ಪತ್ರೆಗೆ ದಾಖಲಾಗಿದ್ದ ಗಾನಕೋಗಿಲೆ ಲತಾ ಮಂಗೇಶ್ಕರ್ ಇಂದು ನಿಧನರಾಗಿದ್ದಾರೆ. ಅವರಿಗೆ 93 ವರ್ಷ ವಯಸ್ಸಾಗಿತ್ತು.
ಲತಾ ಅವ ಮೂಲ ಹೆಸರು ಹೇಮಾ. ನಾಟಕವೊಂದರಲ್ಲಿ ಲತಿಕಾ ಪಾತ್ರ ಅಭಿನಯಿಸಿದ ಬಳಿಕೆ ಅವರಿಗೆ ಲತಾ ಮಂಗೇಶ್ಕರ್ ಎಂದು ಮರುನಾಮಕರಣ ಮಾಡಲಾಯಿತು.
ತೊಂಬತ್ತ ಮೂರು ವರ್ಷದ ತುಂಬು ಜೀವನ ನಡೆಸಿದ ಲತಾ ಮಂಗೇಶ್ಕರ್ ಕಳೆದ ಭಾನುವಾರ ಕೊರೊನ ಸೋಂಕು ತಗುಲಿದ ಕಾರಣಕ್ಕೆ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಕೊರೊನ ಜೊತೆಗೆ ನ್ಯೂಮೋನಿಯಾದಿಂದ ಕೂಡ ಬಳಲುತ್ತಿದ್ದರು.
ಏಳು ದಶಕಗಳ ಕಾಲ ಭಾರತೀಯ ಸಂಗೀತ ಕ್ಷೇತ್ರಕ್ಕೆ ವಿಶಿಷ್ಟ ಕೊಡುಗೆ ನೀಡಿದ ಲತಾ ಮಂಗೇಶ್ಕರ್ ಭಾರತೀಯ ಸಂಗೀತ ಇತಿಹಾಸದಲ್ಲಿ ಯುವಪೀಳಿಗೆಯ ಮನಸ್ಸನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದ್ದರು.
1949ರಲ್ಲಿ ವಹಲ್ ಚಿತ್ರದ ಮೂಲಕ ಸಂಗೀತ ಕ್ಷೇತ್ರವನ್ನು ಪ್ರವೇಶಿಸಿದ ಲತಾ ಮಂಗೇಶ್ಕರ್ 1974ರಲ್ಲಿ ತನ್ನ ಸಿರಿಕಂಠದಿಂದ ಗಿನ್ನಿಸ್ ದಾಖಲೆಗಳ ಪುಟದಲ್ಲಿ ಸೇರ್ಪಡೆಯಾಗಿದ್ದರು.
ಏಕಾಂಗಿ, ಯುಗಳ ಮತ್ತು ಹಿನ್ನೆಲೆ ಗಾಯಕಿಯಾಗಿ 25 ಸಾವಿರ ಹಾಡುಗಳನ್ನು ಹಾಡಿ ಇತಿಹಾಸದಲ್ಲಿ ದಾಖಲೆ ಬರೆದಿದ್ದಾರೆ. 1948 ರಿಂದ 1974ರವರೆಗೆ ದೇಶದ 20 ಭಾಷೆಗಳ ಚಿತ್ರಗಳಿಗೆ ಹಿನ್ನೆಲೆ ಗಾಯಕಿಯಾಗಿ ದಣಿವರಿಯದೆ ಹಾಡಿರುವುದು ಲತಾ ಅವರ ಹೆಗ್ಗಳಿಕೆ.
ಲತಾ ಮಂಗೇಶ್ಕರ್ ಕುಟುಂಬವೇ ಸಂಗೀತ ಕ್ಷೇತ್ರದಲ್ಲಿ ಗಣನೀಯ ಸಾಧನೆ ಮಾಡಿ ಸಂಗೀತ ಕ್ಷೇತ್ರಕ್ಕೆ ವಿಶಿಷ್ಟ ಕೊಡುಗೆ ನೀಡಿದೆ.
ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ 1989ರಲ್ಲಿ ಲತಾ ಮಂಗೇಶ್ಕರ್ ಅವರ ಮುಡಿಗೇರಿತು. 2001ರಲ್ಲಿ ದೇಶಕ್ಕೆ ನೀಡಿದ ಕೊಡುಗೆ ಗಳನ್ನು ಗುರುತಿಸಿ ಭಾರತ ರತ್ನ ಪ್ರಶಸ್ತಿ ನೀಡಲಾಯಿತು. ಈ ಪ್ರಶಸ್ತಿಯನ್ನು ಪಡೆದ ಎರಡನೇ ಗಾಯಕಿಯಾಗಿದ್ದಾರೆ.
ಫ್ರಾನ್ಸ್ ತನ್ನ ಅತ್ಯುನ್ನತ ನಾಗರಿಕ ಪ್ರಶಸ್ತಿ ಆಫೀಸರ್ ಆಫ್ ಲೀಜನ್ ಆಫ್ ಆನರ್ ನೀಡಿ ಗೌರವಿಸಿದೆ.
ಮೂರು ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳು 15 ಬೆಂಗಾಲ್ ಚಲನಚಿತ್ರ ಪತ್ರಕರ್ತ ಸಂಘದ ಪ್ರಶಸ್ತಿಗಳು, ನಾಲ್ಕು ಫಿಲ್ಮಿಫೇರ್ ಅತ್ಯುತ್ತಮ ಮಹಿಳಾ ಹಿನ್ನೆಲೆ ಪ್ರಶಸ್ತಿಗಳು, ಎರಡು ಫಿಲ್ಮ್ ಫೇರ್ ವಿಶೇಷ ಪ್ರಶಸ್ತಿಗಳು, ಫಿಲ್ಮ್ ಫೇರ್ ಜೀವಮಾನ ಸಾಧನೆ ಪ್ರಶಸ್ತಿ ಮತ್ತು 1974ರಲ್ಲಿ ಲಂಡನ್ ರಾಯಲ್ ಅಲ್ಬರ್ಟ್ ಹಾಲ್ ನಲ್ಲಿ ಪ್ರದರ್ಶನ ನೀಡಿದ ಮೊದಲ ಭಾರತೀಯ ಮಹಿಳೆಯಾಗಿದ್ದಾರೆ.
ಲತಾ 1929ರಲ್ಲಿ ಮರಾಠಿ ಮತ್ತು ಕೊಂಕಣಿ ಸಂಗೀತಗಾರರಾದ ದೀನನಾಥ್ ಮಂಗೇಶ್ಕರ್ ದಂಪತಿಗೆ ಹಿರಿಯ ಮಗಳಾಗಿ ಜನಿಸಿದರು. ಲತಾ ಜನಿಸಿದಾಗ ಹೇಮಾ ಎಂದು ಹೆಸರಿಡಲಾಗಿತ್ತು. ಆಕೆಯ ಪೋಷಕರು ನಂತರ ಆಕೆಯ ತಂದೆಯ ನಾಟಕಗಳಲ್ಲಿ ಒಂದಾದ ಭಾವಬಂಧನ್ ನಲ್ಲಿ ಲತಿಕಾ ಎಂಬ ಸ್ತ್ರೀ ಪಾತ್ರ ಮಾಡಿದರು. ನಂತರ ಲತಾ ಮಂಗೇಶ್ಕರ್ ಎಂದು ಮರುನಾಮಕರಣ ಮಾಡಲಾಯಿತು.
