ಮುಂಬರುವ ಪಂಜಾಬ್ ವಿಧಾನಸಭಾ ಚುನಾವಣೆಗೆ ಆಡಳಿತಾರೂಢ ಕಾಂಗ್ರೆಸ್ ಜನವರಿ 3ರಂದು ಮೊಗಾ ಜಿಲ್ಲೆಯಲ್ಲಿ ಮೆಗಾ ರ್ಯಾಲಿಯನ್ನು ಹಮ್ಮಿಕೊಂಡಿದೆ. ಕಿಲ್ಲಿ ಚಾಹ್ಲಾನ್ ಗ್ರಾಮದಲ್ಲಿ ನಡೆಯಲಿರುವ ಬೃಹತ್ ರ್ಯಾಲಿಯನ್ನು ಉದ್ದೇಶಿಸಿ ಎಐಸಿಸಿ ನಾಯಕ ರಾಹುಲ್ ಗಾಂಧಿ ಮಾತನಾಡಲಿದ್ದಾರೆ ಎಂದು ಸ್ಥಳೀಯ ಕಾಂಗ್ರೆಸ್ ಮುಖಂಡರು ತಿಳಿಸಿದ್ದಾರೆ.
ಸಚಿವ ಭರತ್ ಭೂಷನ್ ಆಶು ಮಾತನಾಡಿ, ಮೊಗಾ ಜಿಲ್ಲೆ ಪಂಜಾಬ್ ನ ಕೇಂದ್ರ ಬಿಂದುವಾಗಿದೆ. ಆದ್ದರಿಂದ ಇಲ್ಲಿಂದಲೇ ಪ್ರಚಾರ ಆರಂಭಿಸಲಾಗುವುದು. ಕಿಲ್ಲಿ ಚಾಹ್ಲಾನ್ ಗ್ರಾಮವನ್ನು ಮಜಾ, ಮಾಲ್ವಾ ಮತ್ತು ದೋಬಾದಿಂದ ಸುಲಭವಾಗಿ ತಲುಪಬಹುದು. ಹಾಗಾಗಿ ಈ ಗ್ರಾಮದಲ್ಲಿ ಮೊದಲ ರ್ಯಾಲಿ ನಡೆಸುತ್ತೇವೆ ಎಂದು ಹೇಳಿದ್ದಾರೆ.
2019ರಲ್ಲಿಯೂ ಸಹ ರಾಹುಲ್ ಗಾಂಧಿ ಪಂಜಾಬ್ ಲೋಕಸಭೆ ಚುನಾವಣೆಯಲ್ಲಿ ಕಿಲ್ಲಿ ಚಾಹ್ಲಾನ್ ನಿಂದಲೇ ಕಾಂಗ್ರೆಸ್ ಪ್ರಚಾರ ರ್ಯಾಲಿಯನ್ನು ಆರಂಭಿಸಿದ್ದರು.
ಇತ್ತೀಚೆಗೆ ಶಿರೋಮಣಿ ಅಕಾಲಿದಳ ಕೂಡ ಈ ಸ್ಥಳದಲ್ಲಿ 100ನೇ ವರ್ಷದ ಸಂಭ್ರಮಾಚರಣೆ ರ್ಯಾಲಿಯನ್ನು ಇಲ್ಲಿಯೇ ನಡೆಸಿತ್ತು.
ರ್ಯಾಲಿಗಾಗಿ ಸಾಕಷ್ಟು ವ್ಯವಸ್ಥೆ ಮಾಡಲು ಅಗತ್ಯವಿರುವ ದೊಡ್ಡ ಪ್ರಮಾಣದ ಭೂಮಿ ಕಿಲ್ಲಿ ಚಾಹ್ಲಾನ್ ನಲ್ಲಿ ಸುಲಭವಾಗಿ ಲಭ್ಯವಿದೆ. ಹಾಗಾಗಿ ಮತ್ತೆ ಅದೇ ಸ್ಥಳವನ್ನು ಆಯ್ಕೆ ಮಾಡಲಾಗಿದೆ ಎಂದು ಶಾಸಕ ಡಾ.ಹರ್ಜೋತ್ ಕಮಾಲ್ ತಿಳಿಸಿದ್ದಾರೆ.
ಪಂಜಾಬ್ ಚುನಾವಣೆಗೆ ಕಾಂಗ್ರೆಸ್ ಪ್ರಚಾರವನ್ನು ಔಪಚಾರಿಕವಾಗಿ ಪ್ರಾರಂಭಿಸುತ್ತಿದ್ದು, ಕನಿಷ್ಠ ಒಂದು ಲಕ್ಷ ಜನರು ಸೇರುತ್ತಾರೆಂದು ಕಮಾಲ್ ಹೇಳಿಕೆಯನ್ನು ಉಲ್ಲೇಖಿಸಿ ಇಂಡಿಯನ್ ಎಕ್ಸ್ ಪ್ರೆಸ್ ವರದಿ ಮಾಡಿದೆ.
