ಗಾಂಧೀಜಿಯ ತತ್ವವನ್ನು ಒಪ್ಪದ ಒಂದು ತತ್ವವಿದೆ, ಅದಕ್ಕೊಂದು ಪುಸ್ತಕವೂ ಇದೆ. ಅದೇ ಮನುಸ್ಮೃತಿ, ಮನುಸ್ಮೃತಿಯ ತತ್ವ ಒಪ್ಪದ ಗಾಂಧಿಯನ್ನು ಮನುತತ್ವವಾದಿಗಳು ಗೂಡ್ಸೆಯ ಮೂಲಕ ಗಾಂಧಿಯನ್ನು ಹತ್ಯೆ ಮಾಡಿಸಿದರು ಎಂದು ಗಾಂಧಿ ವಿಚಾರ ಪರಿಚಾರಕ ಮಂಗಳೂರು ವಿಜಯ ಆರೋಪಿಸಿದರು.
ತುಮಕೂರು ನಗರದ ಆರ್.ಟಿ.ನಗರದ ರವೀಂದ್ರ ಕಲಾನಿಕೇತನದ ಸಭಾಂಗಣದಲ್ಲಿ ಕರ್ನಾಟಕ ಗಾಂಧಿ ಸ್ಮಾರಕ ನಿಧಿ ಮತ್ತು ಬಾಪೂಜಿ ವಿದ್ಯಾ ಸಂಸ್ಥೆಯ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ತಿಂಗಳ ತಿಳಿವು-4 ಕಾರ್ಯಕ್ರಮದಲ್ಲಿ ಲೇಖಕ ಡಿ.ಎಸ್.ನಾಗಭೂಷಣ ಅವರ ಗಾಂಧಿ ಕಥನ ಓದು-ಚರ್ಚೆ-ಸಂವಾದದಲ್ಲಿ ಗಾಂದಿ ಕಥನ ಪುಸ್ತಕದ ಕುರಿತು ಅವರು ಮಾತನಾಡಿದರು.
ಯಾವ ಧರ್ಮವೂ ಇನ್ನೊಂದು ಧರ್ಮ ಶ್ರೇಷ್ಠ ಎಂದು ಹೇಳಿಲ್ಲ, ಕರ್ತವ್ಯಕ್ಕಿಂತ ಬೇರೆ ದೇವರಿಲ್ಲ, ರಾಮ, ಕೃಷ್ಣ ಎಂದೆಲ್ಲಾ ಹೇಳುತ್ತಾರೆ. ಆದರೆ ಗಾಂಧಿಯವರ ರಾಮ ಬೇರೆ, ಗಾಂಧೀಜಿಯವರ ರಾಮರಾಜ್ಯ ಬೇರೆಯಾಗಿತ್ತು, ಗಾಂಧಿಯ ರಾಮನನ್ನು ಒಪ್ಪದವರು ಮಹಾತ್ಮ ಗಾಂಧಿಯನ್ನು ಕೊಂದರು ಎಂದು ಹೇಳಿದರು.
ಗಾಂಧೀಜಿಯವರು ಮನುಸ್ಮೃತಿಯಲ್ಲಿರುವ ಅನೇಕ ಅಂಶಗಳನ್ನು ಒಪ್ಪಲಿಲ್ಲ, ಗಾಂಧೀಜಿಯು ಎಲ್ಲರನ್ನೂ ಸಮಾನತೆಯಿಂದ ಕಾಣಬೇಕು, ಮೇಲು-ಕೀಳು ಎಂಬುದು ಇರಬಾರದು, ಜಾತಿ ಅಸಮತೋಲನ, ನನ್ನ ಧರ್ಮ ಶ್ರೇಷ್ಠ-ಇತರರ ಧರ್ಮ ಕನಿಷ್ಠ ಎಂಬುದನ್ನು ಒಪ್ಪಲಿಲ್ಲ, ಎಲ್ಲಾ ಧರ್ಮಗಳು ಅವರವರ ಪಾಲಿಗೆ ಶ್ರೇಷ್ಠ ಎಂದು ಪ್ರತಿ ಪಾದಿಸಿದರು, ಅದೇ ರೀತಿ ಪುರುಷ-ಮಹಿಳೆಯರಲ್ಲಿ ತಾರತಮ್ಯವಿರಬಾರದು, ಇಬ್ಬರೂ ಸಮಾನರು, ಇಬ್ಬರಿಗೂ ಸಮಾನತೆ ಇರಬೇಕು ಎಂದು ಹೇಳಿದರು, ಸಮಾಜದಲ್ಲಿ ಬಡವ ಶ್ರೀಮಂತ ಎಂಬುದು ಸಹ ಇರಬಾರದು, ಆರ್ಥಿಕ ಸಮಾನತೆ ಪ್ರತಿಯೊಬ್ಬರಿಗೂ ಇರಬೇಕು ಎಂಬ ತತ್ವವನ್ನು ಹೊಂದಿದ್ದವರು ಎಂದು ವಿವರಿಸಿದರು.
ಗಾಂಧಿಯ ಈ ತತ್ವಗಳನ್ನು ಮನು ಧರ್ಮ ಪ್ರತಿಪಾದಕರು ಒಪ್ಪಲು ಸಾಧ್ಯವಿಲ್ಲದ ಕಾರಣ ಅವರಲ್ಲಿ ಗಾಂಧಿಯ ಬಗ್ಗೆ ಅಸಮಾಧಾನ ಮತ್ತು ಗಾಂಧಿಯನ್ನು ಒಪ್ಪಿಕೊಳ್ಳಲು ಸಾಧ್ಯವೇ ಇಲ್ಲ ಎಂಬ ಪರಿಸ್ಥಿತಿ ಇತ್ತು. ಹೀಗಾಗಿ ಮನುವಾದಿಗಳು ಗೋಡ್ಸೆಯ ಮೂಲಕ ಗಾಂಧಿಯನ್ನು ಕೊಂದರು ಎಂದು ಹೇಳಿದರು.
ತುಮಕೂರು ವಿಶ್ವವಿದ್ಯಾನಿಲಯದ ಇಂಗ್ಲೀಷ್ ವಿಭಾಗದ ಸಹ ಪ್ರಾಧ್ಯಾಪಕಿ ಡಾ.ಜ್ಯೋತಿ ಅವರು ಡಿ.ಎಸ್.ನಾಗಭೂಷಣ್ ಅವರು ತಮ್ಮ ಜೀವಿತಾವಧಿಯುದ್ದಕ್ಕೂ ಗಾಂಧಿಯನ್ನು ಅಧ್ಯಯನ ಮಾಡಿ ಗಾಂಧಿ ಕಥನವನ್ನು ನೀಡಿದ್ದಾರೆ, ಈ ಪುಸ್ತಕವು ಎಲ್ಲರಿಗೂ ಅರ್ಥವಾಗುವ ರೀತಿಯಲ್ಲಿ ಸರಳವಾಗಿ ಬರೆದಿದ್ದಾರೆ ಎಂದರು.
ಸಮಾರಂಭದ ಅಧ್ಯಕ್ಷತೆಯನ್ನು ಬಾಪೂಜಿ ವಿದ್ಯಾ ಸಂಸ್ಥೆಯ ಕಾರ್ಯದರ್ಶಿ ಎಂ.ಬಸವಯ್ಯ ವಹಿಸಿದ್ದರು, ಜಿ.ವಿ.ವಿ,ಶಾಸ್ತ್ರಿ ಮತ್ತು ಪುಟ್ಟಕಾಮಣ್ಣ ಇದ್ದರು. ಉಪನ್ಯಾಸಕ ಹೆಚ್.ಗೋವಿಂದಯ್ಯ ನಿರೂಪಿಸಿದರು.
