ಶ್ರೀಮಂತರ ಸಾಲ ಮನ್ನಾ ಮಾಡುವುದು ದೇಶಭಕ್ತಿಯೇ? ಸಿಪಿಎಂ ಪ್ರಧಾನ ಕಾರ್ಯದರ್ಶಿ ಎಂ.ಎ.ಬೇಬಿ ಪ್ರಶ್ನೆ

ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದ ಕೇಂದ್ರದ ಬಿಜೆಪಿ ಸರ್ಕಾರ ಸುಮಾರು 16 ಲಕ್ಷ ಕೋಟಿಗೂ ಹೆಚ್ಚು ಶ್ರೀಮಂತರ, ಕಾರ್ಪೋರೇಟ್ ಕಂಪನಿಗಳ ಬ್ಯಾಂಕ್ ಸಾಲಗಳನ್ನು ಮನ್ನಾ ಮಾಡಿರುವುದು ದೇಶಭಕ್ತಿಯ ಪ್ರತೀಕವೇ? ಕೇಂದ್ರ ಸರ್ಕಾರದ ಸಾಧನೆಯೇ? ಎಂದು ಸಿಪಿಐ(ಎಂ) ಪ್ರಧಾನ ಕಾರ್ಯದರ್ಶಿ ಎಂ.ಎ.ಬೇಬಿ ಪ್ರಶ್ನಿಸಿದ್ದಾರೆ.

ತುಮಕೂರಿನ ಜನಚಳವಳಿ ಕೇಂದ್ರದಲ್ಲಿ ಸಿಪಿಐ(ಎಂ) ಜಿಲ್ಲಾ ಸಮಿತಿ ಶನಿವಾರ ಹಮ್ಮಿಕೊಂಡಿದ್ದ ಭಾರತದ ಮುಂದಿರುವ ಸಮಕಾಲಿನ ಸವಾಲುಗಳು ವಿಷಯ ಕುರಿತ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ರೈತರು, ವಿದ್ಯಾರ್ಥಿಗಳು, ಕಾರ್ಮಿಕರು, ನಿರುದ್ಯೋಗಿ ಯುವಜನರ ಸಮಸ್ಯೆಗಳನ್ನು ನೀಗಿಸಲು ಪ್ರಯತ್ನಪಡದ ಕೇಂದ್ರ ಸರ್ಕಾರ ಉಳ್ಳವರ ಸಾಲ ಮನ್ನಾ ಮಾಡುವುದು ಎಷ್ಟು ಸರಿ ಎಂದು ಕೇಳಿದರು.

ಫ್ಯಾಸಿಸಂ ಹಾಗೂ ಸರ್ವಾಧಿಕಾರಿ ಧೋರಣೆಗಳ ವಿರುದ್ಧ ಜಗತ್ತಿನಲ್ಲಿ ಹೋರಾಟಗಳು ನಡೆದಿದ್ದು ಯಶಸ್ವಿಯಾಗಿರುವುದು ಕಣ್ಣೆದುರಿಗಿದೆ. ಭಾರತದಲ್ಲೂ ಸಹ ಇದೇ ಧೋರಣೆಯನ್ನು ಅನುಸರಿಸುತ್ತಿರುವ ಕೇಂದ್ರ ಸರ್ಕಾರದ ವಿರುದ್ಧ ದೇಶಾದ್ಯಂತ ಹೋರಾಟಗಳು ನಡೆಯುತ್ತಿರುವುದು ಗಮನಾರ್ಹವಾಗಿದೆ ಎಂದು ತಿಳಿಸಿದರು.

ಸಾಂಸ್ಕೃತಿಕ ನೀತಿ ಜಾರಿಯ ಮೂಲಕ ರಾಜಕಾರಣ ಮಾಡುತ್ತಿರುವ ಬಿಜೆಪಿ ಸಂಘ ಪರಿವಾರದ ಧೋರಣೆ ಸಂವಿಧಾನ ವಿರೋಧಿಯಾಗಿದೆ. ಬೆಲೆ ಏರಿಕೆ, ನಿರುದ್ಯೋಗ, ರೈತರ ಸಮಸ್ಯೆ, ಯುವಜನರ ಉದ್ಯೋಗದ ಪ್ರಶ್ನೆಗಳ ಕುರಿತು ಸೊಲ್ಲೆತ್ತದ ನರೇಂದ್ರ ಮೋದಿಯವರ ಸರ್ಕಾರ ಜನರ ಗಮನವನ್ನು ಬೇರೆಡೆಗೆ ಸೆಳೆಯಲು ಅಲ್ಪಸಂಖ್ಯಾತರನ್ನು ಕೇಂದ್ರೀಕರಿಸಿ ದ್ವೇಷ ರಾಜಕಾರಣ ಮಾಡುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಚುನಾವಣಾ ಆಯೋಗ ಮತದಾರರ ಪಟ್ಟಿ ಪರಿಷ್ಕರಣೆಯ ಹೆಸರಿನಲ್ಲಿ ಎಸ್‌ಐಆರ್ ಮೂಲಕ ಅರ್ಹ ಸುಮಾರು 13 ಕೋಟಿ ಮತದಾರರನ್ನು ಮತದಾರರ ಪಟ್ಟಿಯಿಂದ ಹೊರಗಿಟ್ಟು ಪರಿಷ್ಕರಣೆ ಮಾಡಿರುವುದು ಸಂವಿಧಾನ ವಿರೋಧಿಯಾಗಿದೆ. ಕೇಂದ್ರ ಸರ್ಕಾರ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ಕುಮಾರ್ ಕಾನೂನುಬಾಹಿರ ನಡೆಯನ್ನು ಪ್ರತ್ಯಕ್ಷವಾಗಿ, ಪರೋಕ್ಷವಾಗಿ ಸಮರ್ಥಿಸುತ್ತಿರುವುದು ಜನವಿರೋಧಿಯಾಗಿದ್ದು ಈ ಸಂಬಂಧ ನಿರಂತರ ಹೋರಾಟಗಳು ನಡೆಯುತ್ತಿವೆ. ತಪ್ಪಿತಸ್ಥರ ವಿರುದ್ಧ ಕ್ರಮ ಜರುಗುವವರೆಗೂ ಪ್ರತಿಭಟನೆ ಅನಿವಾರ್ಯವಾಗಿದೆ ಎಂದು ತಿಳಿಸಿದರು.

ರಾಜ್ಯ ಕಾರ್ಯದರ್ಶಿ ಕೆ. ಪ್ರಕಾಶ್ ಅಧ್ಯಕ್ಷತೆ ವಹಿಸಿದ್ದರು. ಸೈಯದ್‌ ಮುಜೀಬ್, ಎನ್.ಕೆ.ಸುಬ್ರಮಣ್ಯ, ನರಸಿಂಹಮೂರ್ತಿ ಇದ್ದರು. ಸಂವಾದದಲ್ಲಿ ಜನಪರ ಚಿಂತಕ ಕೆ.ದೊರೈರಾಜ್, ಡಾ. ಹೆಚ್.ಎಸ್.ನಿರಂಜನಾರಾಧ್ಯ, ಪರಿಸರವಾದಿ ಸಿ.ಯತಿರಾಜು, ರೈತಸಂಘದ ಶಂಕರಪ್ಪ, ಪತ್ರಕರ್ತ ನಾಗೇಂದ್ರ ಕುಮಾರ್, ರೆಡ್‌ಶರ್ಟ್ ರಾಜೇಂದ್ರ, ಲೋಹಿಯಾವಾದಿ ನಟರಾಜಪ್ಪ, ಪಂಡಿತ್ ಜವಾಹರ್, ತಾಜುದ್ದೀನ್ ಷರೀಷ್, ಇನ್ಸಾಪ್ ರಫೀಕ್, ಟಿ.ಆರ್. ಕಲ್ಪನಾ, ಅನುಸೂಯ, ಡಿ.ವೈ.ಎಫ್‌ಐನ ಈ ಶಿವಣ್ಣ, ಮಂಜುನಾಥ್ ಎಂ.ಜಿ, ಬು.ಸುಬ್ರಮಣ್ಯ, ಕೊಳಗೇರಿ ಸಂಘದ, ಎ.ನರಸಿಂಹಮೂರ್ತಿ, ಅರುಣ್, ರಂಗಧಾಮಯ್ಯ, ಸುಜಿತ್‌ನಾಯಕ್, ಶಿವಕುಮಾರ ಸ್ವಾಮಿ, ಜಗದೀಶ್, ವಿಜ್ಞಾನ ಕೇಂದ್ರದ ಅಕ್ಕಮ್ಮ, ಪ್ರಸಾದ್, ಪಿಂಚಣಿದಾರರ ಸಂಘದ ಟಿ.ಜಿ.ಶಿವಲಿಂಗಯ್ಯ, ಕೆಪಿಆರ್‌ಎಸ್‌ನ ಭೋಜರಾಜು, ಆರ್.ಎಸ್.ಚನ್ನಬಸಣ್ಣ, ಪವನ್‌ಗಂಗಾಧರ್, ಮಧು, ಬಾಲಕೃಷ್ಣ ಪಾಲ್ಗೊಂಡಿದ್ದರು.